Cartas a Fonsu.

Cuyón de Paredes
                                             
Querido Afiau:  Dious quera qu'al presente t'alcuentres abondo bien ;
nos vamus tranpalantrán. Quies saber cousas del añu postreiro. Dalgunas
esqueicénunseme. Outras vou contátelas. Ya, cunesu, venu'l principín ya
tovu mirandu cúmu se facía un maniego. Mira que ta bonu, se veniera fay
muitus añus, cuando nos tovía íbamus a lus nigus, vía poner un culu a un
pote a Cuyón de Paredes, ya vía tamién facer paré al Pesetu la
Rebotsada, ya predicar al cura de Paredes que caéu co la mula pul
Cabanón, morriendu el probe animal ya encetánduse un pouco el cura, que
caéu encima. Tovu muitu bien la vesita del principín; s'amanu bien
arreglarase dalgún carreiru, que bona falta fay, que nun tien tol mundu
un licóteru pa atayar.Facía más de setenta añus que nun tsegaba al ríu
d'Ese outru principín. Entós diénun-i unas madreñas n'Aspina, ya tséu
dous ou tres parolas en bable, al tsegar a Payares. Daquetsa, ya taría
la Roxelia cantandu vaqueiras, taría Gayu las Tabiernas vendiendu cargas
de tseña  pur Tsubarca, ya tucaban la gaita pu la sierra de Bustetsán el
Calamandru ya Valiente las Cuyares. Muitu antes que los rusus fixeran
uscilante l'antena de la TV de Muscú, construíu el Pesetu dificius cun
madera d'ablaneiru, qu'agarrinchaban cu l'aire las castañas. Cuandu Gayu
las Tabiernas vendía una carga de tseña, falaba cul personal de to lus
bancus de Tsubarca a ver quién i daba más d'interés. ¡Iban a cubrá-i
güey cumisiones lus banqueirus de Tsubarca pu lus güevus! D'aquetsa
vivía tamién Fonsu de Bustetsán, qu'una vez encabrunóu a lus guardias
pur cuntá-is, en castetsanu, que tsevaba potsas nas banastras. Tovía
pémeque nun morriera Pichu, qu'era'l más probe de la braña, ya, cunesu,
féixuse de nueite qu'era l'ánima en pena de Pacharón el viechu, ya
sacouchi al fichu del difuntu la miyor vaca de la corte.
  Tovu bien el manegueiru esplicanu-i al princupín cúmu se facían las
blingas, ya cúmu se turraba la madera primeiru; tamién tevu bien el qui
contóu al principín cúmu se facían galanes co las mozas nus esfuyones,
cumu se don Felipe nun sopiera qué facer co la gamayona noruega, s'amanu
bien.
  Peru naide diou tanta fama a Paredes, naide foy tan célebre cumu'l
rumendón Cuyón de Paredes, qu'andaba cu nu caxón al hombro, purque yera
tan probe que nun tenía cuase pa cumprar un pullu que-i tsevase las
arabía p'arreglar lus culus de los potes. Peru cuyón andaba to la
redolada, to'l vatse del Ese, de las Tabiernas a Caneiru.Una vez ,dixu-i
una muyer a Cuyón: "Ya se you pongu'l culu p'arreglar el pote, ¿cuántu
costa?" Ya contestóu Cuyón, ya naquel tiempu, cumu se fora un camareru
de Tsubarca: "¿Vey pagame usté n'eurus ou en riales? Acabáramus"
   Ya digute you, afiáu, que , cumu Cuyón de Paredes nun hobu outru, se
nun ya'l Pesetu la Rebuhada, que foy el canteiru qu'inventóu las torres
uscilantes, que nun las inventanun nin lus americanus, nin los rusus,
nin lus de Navia: foy el Pesetu. Ya se las torres ximielgas foran feitas
pul Pesetu nun las tumbaba el Bin Ladín, purque, sicasí, l'ablaneiru
dobla ya nun ruempe.
   Bonu, afiáu, a ver se trabayas muitu pu l'Alemania ya mandas pa lus
viechus d'algún euru, que nunca tan demás. Ya nun se pase pul tanque dir
agora a Bonus Aires, que, patsó, tal amenan.Ya, cunesu, alón.
   Muitus chuchus del tou padrín.
                M. Campa.